حنينة ومدلعة

تشكيل اللجان لتقصي الحقائق باعتبار الحقائق ( غائبة ) تذكرنا بتلك اللجنة التي شكلت لحادث دهس قطار لقطيع مواشي اجتمعت اللجنة بسائق القطار وسألته عن كيفية وقوع الحادث فأجاب : وأنا سائق فجأة القطر طلع من القضيب ومشى مسافة طويلة في الخلاء وضرب البهائم ورجع تاني للقضيب رأيكم شنو ؟؟

( فبهت الذي سأل )

بالأحزان ( متدثر ) وبالأوجاع ( متزمل ) وبالآلام ( متغطي ) يطلع من ( كبة ) إلى ( كبة ) ومن الداخل والخارج تأتيه المصائب ( والبلاوي ) ويصبر ويتحمل أنه ( السودان )

ووطنيون والحمد لله

لا علينا بالسيد عسكوري والأداء المتراجع لشركة زادنا فخر الشركات السودانية منذ توليه قيادتها وما يهمنا أن زادنا ( تستضيف ) ظهر اليوم اجتماع الاتحاد العام الذي رفضته كوستي الحرة ( رسمياً وشعبياً ) ذلك الاجتماع الذي يضم ( حرامية الخيش ) وبعض ( الفاسدين والمفسدين ) الاجتماع الذي ( سينال ) كل مجتمع فيه المليارات ( مكافأة ) على الفشل في زمن ( مكافأة ) الفاشلين ( بتقدير ممتاز )

ما عاد ( النجار ) مميز بالقلم على أذنه .. وما عاد ( العامل ) تميزه ( بقع الزيت ) على ( افروله ) ونظارة اللحام لا تميز ( الحداد ) ومع التطور اختلفت ( عدة الشغل )

والجديد كتير

الأعزاء ( جداً جداً ) كابتن جكسا .. مكي سناده .. فيصل محمد صالح .. د عمر محمود خالد .. موسى المك كور .. عادل أبو جريشه .. عبدالله دينق .. آمال عباس .. تعبان جنينة .. سيف الجامعة .. السر عثمان الطيب .. عبد الرحمن الجريفاوي اللواء إبراهيم محجوب .. عبد الرحمن عبد الرسول

ازيكم كيفنكم أنا لي زمان ما شفتكم !!

عساكم طيبين

وليداتنا الفرحوا بالنجاح في الشهادة السودانية تاني جاتم الفرحة بالقبول ويا شدرابي ود خيتي ست الجيل اريتو الجامعات تزيد فرحتم بالمصاريف المعقولة ..

يا بت أحمد نحن معاك نهنئ بالقبول ونتمنى ما تتمنى بت أحمد ربنا يحفظك ويملأ جوفك صحة وعافية

نزاعات الدول حلولها سياسية أو عسكرية وعلى ما يبدو ( فحروب ) الشرق الأوسط القائمة وصلت مرحلة سيقول طرف فيها ( علي وعلى أعدائي )

إلى لاعبي الهلال البلد ( ما ناقصة ) هم ولا غم وكفانا النحن فيه يلا ( بعد بكرة ) الأحد ريحونا ( ربنا يرحكم ) بالفوز أو النصر وبس

صحفيون إلى جانب الصحافة نجحوا في تقديم برامج إذاعية وتلفزيونية والزميلة عفاف حسن أمين ( وتبادلنا ) معاً يوماً كتابة الأعمدة .. ( سرقتها ) الشاشة من الشعر والقلم والمايكرفون أحييها وأمها معلمة الأجيال الأستاذة التومة وأكيد تستحق نسرين النمر التحية ولايمان أحمد دفع الله الاحترام

بالمناسبة المذيعة سالي عثمان المنضمة مؤخراً لقناة الجزيرة سبقتها أخريات إلى الفضائيات العربية ولا ولن تكون الأخيرة فمذيعاتنا يملكن المواصفات ( وغزوهن ) قادم للفضائيات العالمية

ومن يراهن سيكسب الرهان

أعلن الاتحاد الأفريقي عن زيادة الدعم المالي السنوي لكل اتحادات من اتحاداته ( ال54 ) ليرتفع الدعم من 525 ألف إلى 700 ألف دولار وإلى المجتمعين اليوم بمزرعة زادنا بربكم أفيدونا ( كده كفاكم ) ولا دايرين فوق الزيادة زيادة ؟!

في زمن مضى كانت جدي وخالي وخالتي وعمي وعمتي وفجأة تم قلب ( الياء واو ) فأصبحت جدو وعمو وعمتو وخالو وخالتو .. وحقيقة المناداة ( بالواو ) قوية وشبعانة .. ونديانة وتريانة والأجمل (حنينة ومدلعة ) و .. و .. و

( حلوة شديد )

اللهم ارحم والدينا وجميع موتانا واشف مرضانا وعاف مبتلانا وأصلح حالنا وحال بلدنا وأعدنا إليه وأعده إلينا آمناً مطمئناً ..

جمعة مباركة وكل جمعة وانتو طيبين