في ليلة اكتمال الفرح وليلة اكتمال قمر الانتصارالكبير بعودة شمال كردفان إلى حضن الوطن وتحرير بارا، أم سيالة وجبرة الشيخ وانفتاح طريق الصادرات من أم درمان للأبيض خَرَّ معظم السودانيين سجوداً لله وتعالت التكبيرات والأناشيد في كل قرى وعواصم السودان، واحتفلت كل حارة سودانية بطريقتها، وأنسى الانتصار الميمون أهل السودان كل المرارات التي مروا بها وافتقدوا فيها أعزّ ما يملكون، منازلهم وأموالهم وذكرياتهم لكن عودة بارا والأخريات أعاد لهم ذلك الإحساس النفيس بالناس والحياة.
وقد اتصل بي مجموعة من الأصدقاء من أبناء الجزيرة جمعتهم مدينة ود مدني الودود الولود، وكانوا حينها يحتفلون بطريقتهم غِناءً ونشيداً وأشعاراً بعودة شمال كردفان وقلوبهم وعقولهم مشدود صوب الفاشر، وجعلوا هدية ذلك المساء شاي السودانيين (المُقَنن) باللبن الحليب والزلابية التي اشتهرت بها نساء مدني العريقات.
وقد فوجئت بأنهم أدخلوني في برنامج الإمتاع والمؤآنسة هذا هاتفياً وطلبوا مني المشاركة بحزمة من الذكريات عن كردفان (الغرة أم خيراً جوة وبره) وطلبوا مني أن أساهم في تلك الليلة الباذخة على سهول نجيمات سودانية وأن أقرأ عليهم مجموعة من الأشعارما كتبته وما كتبه الأصدقاء ومن محفوظي من الأدب الشعبي، ولحسن الحظ فلقد أسعفتني مجموعة من المسادير كتبتها في حق الانتصار وكان أمامي قُصاصة من أشعار الأخ الشاعر المطبوع صلاح الدين ود مسيخ التي كتبها في حق الانتصار، وكانت الذاكرة تعج وتصطخب بأشعار الخال الشريف الراحل زين العابدين الهندي في موال سودانية الذي تطل عبره المدن الحبيبات لقلوب كل السودان في الداخل والخارج مدن الوسط والشمال والشرق والغرب.
وعندما انتهت الرواية التي أحبب أن لا تنتهي دونتها في هذه الكلمة التي أرجو أن تكون تميمة زرقاء أو قُل زمردة على أجياد العفيفات والحرائر وشارات شرف على صدور المرابطين والشهداء والكاظمين الغيظ من أبناء شعبي والعافين عن الناس.
مُسدار الضعين
رزيقات الرزق الكان ندية وزينة
خدعوها القباح خلوها زفرة وطينة
البت القبيل كانت تضوي رتينة
بقت الليلة شحادة وذليلة وشينة
حسين خوجلي
مُسدار اللطام
الدّراع حلف بي فاسو ينتف شنبو
والبراي قسم بي سيفو يقطع ضنبو
والمورال حزم بي زندو يفتل سلبو
والسودان مرق عربو وزرقتو وحلبو
حسين خوجلي
مسدار دامرة مستريحة
مادام النِّوير هتكت شَرف بِت عمُّو
ومادام للحِلو سايم عقيدتو ودمُّو
ومادام الرزق نهْبو وحرامو وخمُّو
الدِيب بنقبضْ.. والدابي بِكْتُلو سِمُّو
حسين خوجلي
مسدار بارا
الخَبر الأكيد من بارا جابُو الجيشْ
نصراً بالضُراع.. لا دوشكا لا تشويشْ
يوم دَفَر البِجا.. والنُوبة ضَمُّو قريشْ
الهامِل طَفش.. سرّاق حَمِير العيشْ
حسين خوجلي
مسدار الفرح
يومين الفرح مانع لساني نميمو
فوق الكُسّر الفِي مُكيفات ما بقيمو
في شِين كاف بدا المسح البفشش ضيمو
والفرح العلينا آلملكة الله يديمو
صلاح ود مسيخ
مسدار الصادرات
جهزو وشدو ما حكرو الجبان والشاي
كيفم تَمَو صوت بِلِّي ومَلاواة ياي
طريق الصادرات الكان مَحَجّر ساي
دخلو اللوري كاتبين فوقو قول باي باي
صلاح ود مسيخ
مسدار أم سيالة
زمان قولناها ما تستمعوا للعوعاي
الجيش للبتعجب من قديم سواي
بعد ام قرفة وام سيالة صبحت جاي
يمين في ام فتفت العاجبانا عندنا راي
صلاح ود مسيخ
مسدار الدامر
مُربي الدامر البي ذكرُه عز وجل
واتنوخ فسيح وادّي المجاذيب َطلَه
شوف النار متلعِبة في المساجد ولا
مات نور الضيا وجات بعده نار الجُله
شوف المصحف الاربع قرون بِدّلَه
ماسك وِردُه ام سحرته عين خلق الله
الشريف زين العابدين
مسدار سنار
مطروحة الجبين من سوبا لي سنار
نيليك من غرامن لبسوك سوار
أكنافك موطأة فيها ماء وخضار
ولي عزاز القبائل صرتي أحسن دار
محصولك دهب ما بكيلو بالعبار
مواسمك عدة محسوبات طوال وكتار
أرضك في الجمال محسوبة بالأشبار
مشكلة بالتراب لكن لجين ونضار
الشريف زين العابدين
مسدار أرض المحنة
في مدني الكبير نشأة لك الحيثية
فجرتي المواهب ومنبع الوطنية
بذرة مقدسة اتربت على الحرية
من المؤتمر لي الليلة نامية قوية
من يومك كسبتي الكاس وشلتي الراية
وافكار المحافل باقية ليهم تاية
بي التعليم سقوك وشبعوك قراية
وادوك من شبابهم كل حب ورعاية
الشريف زين العابدين
مسدار أم درمان
حبابك عشرة يابت مقرن النيلين
حبابك يا ام عجن بعد العديل والزين
حبابك يالمحكرة في المشاعر والفؤاد والعين
حبابك يا المغسلة بي طهور مويتين
حباب اهلك بلاعبو الموج مع البردين
حبابهم كتفوا ابوطليح على اللقنين
حباب قصرك ضبح غرودون من الاضنين
حباب الخندق العجن الجلود بي الطين
حباب المهدي فيك كبر حرارة ودين
حباب اسد العرين عبدالله ودتورشين
حباب النور عقيد الخيل عقود الشين
عنقرة المعزة الاصلو مابتلين
حباب الزاكي اداب النقز في الحين
حباب ود النجومي القبره في توشكين
حباب عثمان سواكن دقنه في الدورين
حباب يعقوب حباب محمود وشيخ الدين
سلام يالبقعة مبروكة الاله والدين
حباب الحرورك لا انتماء لادين
حباب السودنوك خلوك سمارة وزين
حباب الازهري النكس ذرا العلمين
حباب الراية هفهافة وتكيل العين
الشريف زين العابدين
مسدار الشرق
وفي شروقك ارض مليانة خير ومعادن
فيها السارح الناشق وفيها الساكن
وفيها المن حلايب جاي غاشي سواكن
وفيها الأركويت نسام أراك وجناين
وفيها غزال جبيت وقل قصاد الشادن
ومن صمد اتطرح لي أربعات بيعاين
الشريف زين العابدين
مسدار جبال النوبة
ومن تقلي ام برم شايل جبال النوبة
عامر بي برشم عريس الحوبة
جلجال والاحيمر نارهم ادفوبه
وين كجذوب وشامي الحارة بتسلوبه
الشريف زين العابدين
مسدار جبل مرة
وجبل مرة الشمخ جايب مناخ لبنان
وفجر من ينابيعه العجاب بستان
طارح عنبه والزيتون مع الرمان
وجاب من يافا تفاحا كبار ومكان
الشريف زين العابدين
مسدار الفاشر
علي دينار كسب ليها الشرف والطول
أبو زكريا أَداب العُصَاة زول زول
من وداي بكريت في ربوعها واجول
لي الكفرة وصحاريها العجاف الهول
الشريف زين العابدين
مسدار الأبيض
قول للأبيض حاجة ما تغشاها
حملتك أمانتاً في الضلوع منشاها
وكت السنة وقعت وأنكوت في حَشَها
منو الغير شبابك دَرّجها ومَشَّاها
عكير الدامر
مسدار الخلوة والعلماء
وابل ما بِصُب من غير سِحاب مِتقَّلِع
وعالم ما بِجَّلِس من غير يكون مِتضّلِع
غير التقوى سِلِم لي الوصول ما بطلع
نار العود تموت نار العلم بتولِع
عكير الدامر